Турција уапси над 280 осомничени за поврзаност со ПКК

Турската полиција уапси 282 осомничени обвинети за врски со Курдистанската работничка партија (ПКК), која ја опишува како милитантна група, објави во вторник турскиот министер за внатрешни работи Али Јерликаја. 

Меѓу нив има новинари, политичари и академици.

Рациите во изминатите пет дена се случија кога Турција продолжува да ги отстранува избраните прокурдски градоначалници од нивните позиции, потег што се совпаѓа со надежите за крај на 40-годишниот конфликт меѓу ПКК и властите, јавува Ројтерс. 

Турскиот синдикат на новинари го осуди притворот на тројцата новинари.

„Не прифаќаме да бидат приведени преку рации во куќи наместо да бидат повикани во полициска станица“, се вели во соопштението на синдикатот на социјалните мрежи.

Меѓу уапсените има членови на Демократскиот конгрес на народот (ХДК), како и помали левичарски партии, академици и истакнати активисти за правата на ЛГБТК.

Полицијата спроведе антитерористички рации во 51 провинција, вклучувајќи го главниот град Анкара и најголемиот град Истанбул. Јерликаја нагласи дека уапсените се осомничени за пропаганда, обезбедување средства за милитантната група, регрутирање членови и приклучување кон улични протести.

Во саботата, Турција смени градоначалник на прокурдската партија ДЕМ во источната провинција Ван од функцијата поради пресуди поврзани со тероризам, со што вкупниот број на разрешени градоначалници на ДЕМ се искачи на осум од изборите во 2024 година.

ПКК, прогласена за терористичка организација од Турција и нејзините западни сојузници, води бунт против државата од 1984 година, во конфликт во кој беа убиени повеќе од 40 луѓе.