-
Превод: Флутура Гаши-Мехмети
- 5 јуни 2025 година, 07:16 часот
- Споделете на:
Американскиот претседател Доналд Трамп во средата потпиша забрана за патување во САД за граѓани на 12 земји, во обид да ги „заштити Американците од опасни странски актери“.
Земјите чии граѓани имаат забрана за патување се: Авганистан, Бурма, Чад, Република Конго, Екваторска Гвинеја, Еритреја, Хаити, Иран, Либија, Сомалија, Судан и Јемен.
Постојат уште седум земји чии граѓани се соочуваат со делумни ограничувања за патување: Бурунди, Куба, Лаос, Сиера Леоне, Того, Туркменистан и Венецуела, јавува Би-Би-Си.
Постојат некои исклучоци, вклучувајќи спортисти кои патуваат за големи спортски настани, некои авганистански државјани и лица со двојно државјанство во незасегнати земји.
Одлуката е одраз на наредбата од првиот мандат на Трамп во 2017 година, кога тој објави забрана за патување во САД за луѓе од седум земји со муслиманско мнозинство.
Забраната за патување, која стапува на сила на 9 јуни, го исполнува ветувањето што Трамп го даде за време на неговата изборна кампања во 2024 година и веројатно ќе предизвика брзи правни спорови.
Трамп за забраната за 12 земји: Не ги сакаме
Фото: Асошиетед прес
Американскиот претседател Доналд Трамп изјави дека неодамнешниот напад во Болдер, Колорадо, каде што 12 лица беа повредени кога еден маж нападна група собрана во поддршка на израелските заложници, ги истакнува екстремните ризици што ги претставуваат за САД влезот на странски државјани без соодветна проверка, како и оние кои доаѓаат како привремени посетители и остануваат подолго од важењето на нивните визи.
„Не ги сакаме“, рече Трамп, додавајќи дека верува оти САД не можат да имаат „отворена миграција кон која било земја каде што не можат безбедно и сигурно да ги проверуваат и контролираат оние што бараат влез“.
„Силината на овие нови применети ограничувања зависи од сериозноста на заканата што се претставува“, продолжи Трамп.
Тој додаде дека списокот на земји под забрана е „подлежи на преглед“ доколку се направат подобрувања.
