Трамп негира дека понудил олеснување на санкциите за Иран

Presidenti amerikan, Donald Trump, ka thënë se nuk i ka ofruar Iranit asgjë për t’i dhënë fund luftës, duke hedhur poshtë raportimet e mediave që, duke cituar zyrtarë amerikanë, kanë thënë se ai ishte i gatshëm të lehtësonte sanksionet dhe të lironte fondet e ngrira, në këmbim të hapave “konkretë” lidhur me programin bërthamor të Iranit.

“Kjo nuk është e vërtetë. Unë nuk u ofrova asgjë”, ka shkruar Trumpi të hënën në Truth Social.
Axios dhe CNN raportuan, duke cituar zyrtarë amerikanë të paidentifikuar, se Trump ishte i gatshëm t’i ofronte Iranit lehtësim nga sanksionet dhe të lironte fondet iraniane, si pjesë e një marrëveshjeje përfundimtare, me kusht që Irani të tregonte “përparim konkret” për çështjen bërthamore.

Trumpi ka përmendur parandalimin e Teheranit zyrtar nga sigurimi i një bombe bërthamore si një nga objektivat kryesore të luftës, së bashku me eliminimin e aftësisë së tij për të sulmuar fqinjët dhe krijimin e kushteve që iranianët të rrëzojnë udhëheqjen e tyre.

Irani nuk ka armë bërthamore dhe mohon se dëshiron të zhvillojë të tilla, por argumenton se ka të drejtë të ketë një kapacitet vendas për prodhimin e energjisë bërthamore.

Presidenti iranian, Masoud Pezeshkian, në një intervistë për emisionin “Face the Nation” të CBS, ka thënë se Teherani është i gatshëm për bisedime mbi programin e tij bërthamor dhe çështje të tjera, por nuk do të pranojë “ngacmime apo detyrim”.

“Irani nuk po kërkon luftë, por do të mbrojë veten nga presioni, kërcënimet dhe sulmet”, ka thënë Pezeshkian, duke shtuar se tashmë ishte rënë dakord që “ne nuk duhet të zhvillojmë armë bërthamore”.

Zyrtarë amerikanë dhe iranianë kanë zhvilluar veçmas bisedime me ndërmjetësues të hënën, si pjesë e një përpjekjeje të ripërtërirë për t’i dhënë fund luftës shtatëmujore, sipas zyrtarëve të të dyja vendeve.

Irani ka këmbëngulur të dielën se vetëm diplomacia mund ta zgjidhë konfliktin e tij me Shtetet e Bashkuara dhe Izraelin.

“Kushtet tona janë të qarta dhe çdo lëvizje drejt rihapjes së Ngushticës së Hormuzit varet nga përmbushja e këtyre kushteve”, ka shkruar në rrjetet sociale ministri i Jashtëm iranian, Abbas Araghchi.

“Vetëm një zgjidhje e negociuar mund t’i nxjerrë ata nga kjo ngërç.”

Araghchi u ka thënë gazetarëve në OKB të premten se marrëveshja e propozuar do të aktivizonte një numërim mbrapsht prej shtatë ditësh për rihapjen e ngushticës dhe një pauzë në luftimet rajonale.

Trumpi e ka hedhur poshtë planin të shtunën dhe ka argumentuar se dëshpërimi po i shtynte iranianët të kërkonin një marrëveshje për këtë rrugë kyçe ujore.

“Ata duan të bëjnë një marrëveshje për të hapur menjëherë Ngushticën e Hormuzit, sepse po humbasin shumë keq”, u ka thënë Trumpi gazetarëve në Shtëpinë e Bardhë.