Новоизбраниот претседател на САД, Доналд Трамп, изјави дека трошоците за депортирање илегални имигранти нема да бидат пречка за исполнување на ветувањето за „најголемата депортација досега“.
Во своето прво јавно појавување по победата на 5 ноември, Трамп рече дека негов приоритет штом ќе ја преземе функцијата во јануари ќе биде да ги направи границите „посилни“.
„Тоа не е прашање на цена. Тоа не е. Немаме друга опција“, изјави Трамп за „Ен-би-си њуз“. „Кога убиваа луѓе, дилерите на дрога уништуваа земји и сега тие ќе се вратат во тие земји затоа што повеќе нема да останат тука, нема цена за тоа“.
Трамп ја призна својата победа и поради неговото ветување дека ќе ги депортира имигрантите.
„Луѓето сакаат да имаат граници. И тие сакаат да доаѓаат луѓе, но мора да дојдат со љубов кон земјата. Тие мора да дојдат легално“, рече Трамп.
Додека тимот на кампањата на Трамп даде различни одговори за бројките на депортација, новоизбраниот потпретседател Џеј Ди Венс рече дека ќе започнат со милион.
Експертите постојано оценуваат дека ќе има правни и практични предизвици за депортирање на многу луѓе одеднаш.
