Presidenti i Shteteve të Bashkuara të Amerikës, Donald Trump, ka premtuar se çdo qytetar i rritur amerikan do të marrë nga 5 mijë dollarë nëse Partia Republikane arrin ta ruajë kontrollin mbi Dhomën e Përfaqësuesve dhe Senatin në zgjedhjet e nëntorit.
Trumpi e bëri premtimin gjatë fjalimit në konventën e parë të Partisë Republikane për zgjedhjet e mesmandatit, të mbajtur në Dallas. Ai ka thënë se pagesa do të mundësohej falë fuqisë së madhe ekonomike të Shteteve të Bashkuara.
Gjatë fjalimit gati dyorësh, Trumpi sulmoi Partinë Demokratike dhe u bëri thirrje votuesve që të votojnë sikur ai të ishte personalisht në fletëvotim.
“Ju lutem, imagjinoni sikur unë jam në fletëvotim. Nëse humbim, ju humbni kufirin, lehtësimet tatimore, sigurinë dhe pasurinë”, ka thënë Trump.
Ai pretendoi gjithashtu se mandati i tij i dytë është më i suksesshmi në historinë e SHBA-së, pavarësisht se mbështetja për të në sondazhe aktualisht është rreth 38 për qind.
Premtimi për pagesën prej 5 mijë dollarësh ngriti menjëherë pikëpyetje në aspektin etik, ndërsa pjesa tjetër e fjalimit u përqendrua kryesisht te paralajmërimet për pasojat që, sipas Trumpit, do të sillte një fitore e mundshme e demokratëve.
Trump i akuzoi kundërshtarët politikë se përfaqësojnë “komunizmin radikal” dhe u zotua se do ta mposhtë atë në SHBA.
Megjithëse ishte paralajmëruar se fokusi i konventës do të ishte ulja e kostos së jetesës dhe ekonomia, shumica e folësve u përqendruan te siguria kufitare dhe sulmet ndaj demokratëve për çështjet që lidhen me të drejtat e personave transgjinorë.
Konventa do të vazhdojë të enjten, kur zëvendëspresidenti JD Vance pritet të mbajë fjalimin kryesor.