Доналд Трамп изјави дека можеби ќе отпатува на Блискиот Исток овој викенд, додавајќи дека индиректните преговори меѓу Израел и Хамас се многу блиску до договор и дека, според него, тие одат многу добро.
„Многу е блиску, одат многу добро... Мислам дека ќе се случи, има голема шанса да се случи. Би можел да бидам таму до крајот на неделата. Има голема шанса, преговорите одат многу добро“, им рече Трамп на новинарите.
Египетскиот претседател Абдел Фатах ал-Сиси - кој го покани Трамп да го посети Египет доколку се постигне договор - рече дека знаците од разговорите се „охрабрувачки“, додека Хамас, исто така, изрази „оптимизам“ во врска со индиректните разговори со Израел, објави агенцијата Франс-прес.
„Ал-Кахера њуз“, медиум близок до египетските разузнавачки служби, објави дека започнале вечерните сесии за разговорите во среда.
Трамп рече дека штотуку разговарал по телефон со официјални лица на Блискиот Исток, каде што неговиот специјален пратеник Стив Виткоф и Џаред Кушнер, неговиот зет, пристигнале за да учествуваат во разговорите во Египет, пишува „Гардијан“.
Присутни беа и катарскиот премиер шеик Мохамед бин Абдулрахман Ал Тани и шефот на турското разузнавање Ибрахим Калин. Присутен е и израелскиот министер за стратешки прашања Рон Дермер, близок соработник на Бенјамин Нетанјаху.
Учеството на високи функционери од трите земји донесе поголема надеж дека оваа рунда разговори би можела да доведе до договор, иако сè уште постојат големи разлики меѓу страните.
Турскиот министер за надворешни работи Хакан Фидан изјави дека има „голем напредок“ во преговорите и дека ќе биде прогласен прекин на огнот доколку тие бидат успешни.
Хамас побара меѓународни гаранции дека Израел нема да продолжи со бомбардирањето на Газа откако групата ќе ги ослободи сите преостанати заложници, живи и мртви.
Меѓу точките за кои сè уште треба да се преговара се барањата Хамас да се разоружа, начинот и времето на повлекување на израелските трупи од Појасот Газа и составот на меѓународното тело за кое се очекува да управува со Газа.
Исто така, логистичките детали за размена на затвореници со заложници сè уште треба да се утврдат, а Хамас им предаде на медијаторите список на палестински затвореници што сака да бидат ослободени од израелските затвори.