САД ги поништуваат визите за некои ирански државјани поврзани со владата во Техеран

Администрацијата на Доналд Трамп ги поништи „зелените карти“ или американските визи на најмалку четири ирански државјани поврзани со сегашната или поранешната влада на Иран, вклучувајќи две лица кои беа приведени од имиграциските власти и се очекува да бидат депортирани.

Најновата акција дојде токму оваа недела, кога државниот секретар Марко Рубио утврди дека тие повеќе не се подобни за законски статус на постојан престој или влез во Соединетите Држави. Чекорите следат по одлуката кон крајот на минатата година со која беа поништени и визите на неколку дипломати и вработени во иранската мисија во Обединетите нации.

Во соопштението објавено во саботата, Стејт департментот објави дека внуката и правнуката на поранешниот командант на Иранската револуционерна гарда, Касем Солејмани, кој беше убиен во американски воздушен напад во близина на аеродромот во Багдад во 2020 година, биле уапсени доцна во петокот од имиграциски агенти откако Рубио им ги поништил зелените карти.

„Хамиде Солејмани Афшар и нејзината ќерка сега се под притвор на американската Служба за имиграција и царина“, се вели во соопштението, додавајќи дека и на сопругот на Афшар му е забранет влез во Соединетите Држави.

Според изјавата, Афшар и нејзината ќерка живееле „луксузен живот“ во Лос Анџелес многу години, додека јавно ја поддржувале иранската влада и антиамериканските напади.

исто така СВЕТОТ пред 1 месеци Рубио: Иран се согласи да преговара за својата нуклеарна програма

Таа е „отворен поддржувач на иранскиот режим кој ги слави нападите врз Американците и ја нарекува нашата земја „Големиот ѓавол““, рече Рубио во објава на мрежата X. „Администрацијата на Трамп нема да дозволи нашата земја да стане засолниште за странски државјани кои поддржуваат антиамерикански терористички режими“.

Иранската мисија во Обединетите нации немаше коментар во саботата.