Владата на САД им забрани на персоналот на американската влада во Кина, како и на членовите на нивните семејства, да имаат каков било вид романтична или сексуална врска со кинески граѓани, објави Асошиејтед прес.
Четири извори изјавија за АП за одлуката, која стапи на сила непосредно пред американскиот амбасадор Николас Барнс да ја напушти Кина. Луѓето зборуваа под услов да останат анонимни за доверливото прашање.
Иако некои американски агенции веќе имаат строги правила за таквите односи, таквата политика е нечуена јавно од Студената војна. Не е невообичаено американските дипломати во други земји да имаат романтични односи со локалните жители, па дури и да се омажат за нив.
Верзијата на политиката беше донесена минатото лето, со која на американскиот персонал му се забранува „романтични и сексуални односи“ со кинески државјани кои работат како чувари или помошен персонал во американската амбасада и пет конзулати во Кина. Но, Барнс ја прошири таа политика на целосна забрана на таквите односи со Кинезите во Кина, почнувајќи од јануари, неколку дена откако претседателот Доналд Трамп ја презеде функцијата.
Единствен исклучок од оваа политика е американскиот персонал кој веќе имал романтични врски со кинески државјани пред да се донесе оваа одлука. Тие мора да поднесат барање за да бидат изземени од одлуката, а доколку им биде одбиена мора да ја прекинат врската или да ја напуштат работата. Секој што ќе ја прекрши политиката ќе добие наредба веднаш да ја напушти Кина.
Оваа политика, исто така, е соопштена на американскиот персонал во Кина преку е-пошта, но не е објавено јавно соопштение.