САД и Кина разговараат за план за безбедност на вештачката интелигенција пред средбата Трамп-Си

Zyrtarë të lartë amerikanë dhe kinezë kanë diskutuar krijimin e një "mekanizmi njoftimi" të ri për incidentet që lidhen me inteligjencën artificiale (AI) dhe që mund të ndikojnë në sigurinë kombëtare, ka deklaruar të dielën sekretari i Thesarit, Scott Bessent.

Bessent i ka bërë këto komente pas bisedimeve që i ka cilësuar si "të suksesshme" me zëvendëskryeministrin kinez, He Lifeng, në Neë York.

Takimi është zhvilluar ndërsa presidenti amerikan Donald Trump dhe homologu i tij kinez, Xi Jinping, pritet të mbajnë një samit në Uashington më vonë gjatë kësaj jave.

Inteligjenca artificiale ka qenë në qendër të një shqyrtimi të imtësishëm ditët e fundit, pasi studiuesit paralajmëruan për rreziqet e mundshme që paraqet kjo teknologji dhe disa nga figurat më të shquara të industrisë bënë thirrje që zhvilluesit të adoptojnë një qasje më të kujdesshme.

"Ne mendojmë se, ashtu si në çdo aktivitet ndërkufitar, kalimi nga mungesa e transparencës drejt një transparence më të madhe midis fuqive numër një dhe numër dy në botë për sa i përket AI-së, është shumë i rëndësishëm”, u ka thënë Bessent gazetarëve pas bisedimeve.

Ai ka shtuar se takimi përfshiu gjithashtu tema të tjera, përfshirë planet për të vënë në punë një proces për identifikimin e uljeve të mundshme të tarifave për mallrat, përmes një organi të njohur si Bordi i Tregtisë.

Armëpushimi në luftën tregtare të tarifave midis dy ekonomive më të mëdha në botë pritet të skadojë më 10 nëntor.

Agjencia shtetërore kineze e lajmeve, Xinhua, ka njoftuar se të dyja palët patën "shkëmbime të hapura, të thelluara dhe konstruktive mbi çështjet kryesore ekonomike dhe tregtare", duke vënë në dukje se ato diskutuan edhe për inteligjencën artificiale.

SHBA-ja dhe Kina janë përfshirë në një garë për të dominuar industritë e inteligjencës artificiale dhe teknologjisë.

Ditët e fundit, Uashingtoni është përballur me thirrje për të ngadalësuar zhvillimin e inteligjencës artificiale, për shkak të shqetësimeve mbi ndikimin e saj të mundshëm negativ te njerëzimi.

Trump i ka hedhur poshtë këto shqetësime, duke argumentuar se ekzistojnë politika të mjaftueshme lidhur me AI-në dhe se SHBA-ja nuk mund ta humbasë epërsinë e saj ndaj Kinës.

Ai ka deklaruar javën e kaluar se "kushdo që fiton në fushën e inteligjencës artificiale, fiton gjithçka".