-
Превод: Флутура Гаши-Мехмети
- 22 мај 2025 09:10 часот
- Споделете на:
Финска изјави дека очекува Русија дополнително да го зголеми бројот на војници по должината на нивната заедничка граница кога ќе заврши војната во Украина, по извештаите дека Москва ги зајакнала своите воени бази во близина на границата на земјата-членка на НАТО.
Генерал-мајор Сами Нурми, раководител на стратегијата на финските одбранбени сили, рече дека војската ги следи маневрите на Москва „внимателно“ и дека нивна должност е, како дел од НАТО алијансата, да се „подготват за најлошото“, објави „Гардијан“.
Финската гранична стража во среда објави дека ги завршила првите 35 км од планираната ограда од 200 км на нејзината источна граница со Русија. Границата е затворена повеќе од една година откако Хелсинки ја обвини Москва дека ги насочува барателите на азил кон Финска во „хибридна операција“. Оградата, исто така, користи камери и сензори за да прави разлика помеѓу движењето на луѓе и животни.
Сателитските снимки, објавени во „Њујорк тајмс“, се чини дека покажуваат проширување на руската воена инфраструктура во близина на финската граница, вклучувајќи редови шатори, воени возила, реновирање на засолништа за борбени авиони и изградба на претходно неискористена хеликоптерска база.
„Тие ги менуваат структурите и гледаме умерени подготовки кога станува збор за изградба на инфраструктура во близина на нашите граници, што значи дека тие, штом ќе заврши војната во Украина, ќе почнат да ги враќаат силите што се бореа во Украина, особено копнените сили“, изјави Нурми.
Ова не беше неочекувано бидејќи Финска брзо се приклучи на НАТО во 2023 година по целосната инвазија на Русија врз Украина.
„Тие го прават ова во фази. Би рекол дека сè уште се работи за умерени бројки. Не е голема градба, но на одредени места се одвива изградба на нова инфраструктура и подготовка, внесување на нова опрема“, рече тој.
„Исто така, треба да процениме дали се подготвуваат да испратат повеќе војници во Украина или се подготвуваат да ги зголемат своите сили во близина на нашата граница. Но, мислам дека ги прават и двете“, додаде Нурми.
