-
Превод: Флутура Гаши-Мехмети
- 9 септември 2026 15:14 ч
- Споделете на:
Романија уапси руски државјанин поради шпионажа на нејзините воени бази, спречувајќи план за саботажа, објави Букурешката разузнавачка служба.
Рускиот државјанин, кој живее во Романија, беше уапсен во заедничка операција со други странски разузнавачки агенции откако фотографирал чувствителни воени области, вклучувајќи ги и базите што ги користи НАТО.
Во вторник, Романската разузнавачка служба (SRI) објави дека рускиот државјанин бил под надзор од февруари.
Четириесетгодишникот дејствувал под директна координација на руски супервизор, преку шифрирани услуги за онлајн пораки, се вели во соопштението.
Неколку саботажни напади во Европа се извршени од лица што зборуваат руски јазик, кои дејствуваат како посредници управувани од супервизори во Русија, кои им нуделе пари и инструкции преку интернет.
На осомничениот му било наложено да собира воени разузнавачки податоци и да врши надзор, објави SRI.
Локалните медиуми објавија дека осомничениот фотографирал национални и воени бази на НАТО, како и движењата на војниците и опремата низ земјата.
Истрагата откри дека осомничениот добил инструкции да документира стратешки воени средства, вклучувајќи го и украинскиот транспортен авион „Антонов“, за време на нивниот престој во Романија.
Европа ја обвини Москва за водење хибридна кампања од саботажи, сајбер напади и дезинформации, насочени кон поддржувачите на воените напори на Киев.
Оваа најнова саботажна операција следува по неуспешниот напад со беспилотни летала на аеродромот Лајпциг/Хале, настан што ги ескалираше тензиите меѓу Берлин и Москва.
Кремљ во вторник објави дека Владимир Путин го уверил Доналд Трамп, за време на едночасовниот телефонски разговор насочен кон прекин на војната во Украина, дека Москва нема агресивни намери кон Европа.
Русија постојано негира каква било вмешаност во саботажни акти.