Путин ги предупреди САД за помошта за Украина

Рускиот претседател Владимир Путин изјави дека доколку САД ѝ испорачаат на Украина ракети „Томахавк“ за напади со долг дострел длабоко во Русија, тоа би довело до уништување на односите меѓу Москва и Вашингтон.

Помалку од два месеци откако американскиот претседател Доналд Трамп се сретна со Путин на самитот во Алјаска, мирот изгледа уште подалеку бидејќи руските сили продолжуваат да напредуваат во Украина, а се сомнева дека руските беспилотни летала го нарушиле воздушниот простор на НАТО.

Трамп изјави дека е разочаран од Путин што не склучува мир и ја нарече Русија „хартиен тигар“ затоа што не успеа да ја покори Украина. 

Путин возврати минатата недела, прашувајќи дали НАТО не е „тигар од хартија“ затоа што не успеал да го спречи напредувањето на Русија.

Американскиот потпретседател Џ.Д. Венс минатиот месец изјави дека Вашингтон го разгледува барањето на Украина за набавка на ракети „Томахавк“ со долг дострел кои би можеле да нападнат длабоко во Русија, вклучително и во Москва, иако не е јасно дали е донесена конечна одлука.

„Ова ќе доведе до уништување на нашите односи, или барем на позитивните трендови што се појавија во овие односи“, рече Путин во видео клип објавен во неделата од новинарот на руската државна телевизија Павел Зарубин.

„Волстрит џурнал“ минатата недела објави дека САД ќе ѝ обезбедат на Украина информации за цели на енергетска инфраструктура со долг дострел во Русија, додека истовремено ќе се разгледува дали да се испратат ракети во Киев што би можеле да се користат во такви напади. Двајца функционери го потврдија извештајот на „Волстрит џурнал“ за „Ројтерс“.

Но, американски функционер и уште три извори за Ројтерс изјавија дека желбата на администрацијата на Трамп да испрати ракети со долг дострел „Томахавк“ во Украина можеби не е изводлива бидејќи тековните залихи се наменети за американската морнарица и за други намени.

Крстосувачките ракети „Томахавк“ имаат дострел од 2,500 километри, што значи дека ако Украина ги добие ракетите, тогаш Кремљ и цела европска Русија ќе бидат во дострел.

Путин во четвртокот изјави дека е невозможно да се користат Томахавци без директно учество на американски воен персонал и дека секое снабдување на Украина со такви ракети би предизвикало „нова фаза на ескалација“.