Претседателот на Русија, Владимир Путин, го предупреди Западот да не ја преминува „црвената линија“ со Русија и го осуди, како што рече, заговорот за државен удар против Белорусија.
Неговото предупредување дојде во неговото годишно обраќање на руската државна телевизија, по зголемените тензии со Западот околу Украина и неговиот затворен критичар Алексеј Навални.
„Употребата на неправедни санкции прераснува во нешто поопасно: обид за државен удар во Белорусија“, рече Путин, пренесува Би-Би-Си.
Тој го поддржа претседателот на Белорусија, Александар Лукашенко, кој се соочува со голема опозиција.
На 17 април, белоруските власти објавија дека спречиле, како што рекоа, заговор поддржан од САД за атентат на претседателот Лукашенко. Руската служба за безбедност (ФСБ) објави дека уапсила двајца Белоруси вклучени во заговорот.
Обидот за државен удар беше отфрлен од лидерката на белоруската опозиција Светлана Тихановскаја, која се наоѓа во азил. Таа ова го нарече провокација.
Имаше масовни протести за нејзина поддршка откако Лукашенко беше реизбран за претседател минатата година. Изборниот резултат беше нашироко оспоруван, велејќи дека е наместен. Илјадници демонстранти беа претепани и уапсени.
Претседателот на Русија, Путин, изјави дека Русија сака да има добри односи со сите земји, но дека има постојани обиди на западните сили да ја обвинат Русија.
„Не сакаме да палиме мостови, но ако некој ги протолкува нашите добри намери како слабост, тогаш нашите реакции ќе бидат асиметрични, брзи и груби. Сами ќе одлучиме во секој случај каде е црвената линија“, рече Путин.
Тензиите се зголемија околу Украина, со извештаи дека Русија префрлила повеќе од 100 војници на спорната територија.
Голем дел од тие сили се на Крим, полуостровот што Русија го анектираше од Украина во март 2014 година. Високиот украински воен функционер, Серхиј Најев, го процени вкупниот број сили на околу 103.200.