Две различни групи демонстранти, пропалестински и произраелски, се судрија со тупаници, стапови и клоци на 1 мај во кампусот на Универзитетот во Калифорнија, Лос Анџелес (UCLA).
По неколкучасовна пресметка меѓу овие две групи, полицијата интервенираше за да ги раздвои групите и да го смири насилството.
Само неколку часа претходно, полицијата интервенираше и на друг универзитетски кампус во САД, за да ги растера пропалестинските демонстранти кои се изолираа во зградата на Универзитетот Колумбија.
Полицијата беше поактивна во кампусите низ САД во последните две недели, по протестите со кои се повикуваа универзитетите да престанат да соработуваат со Израел или компаниите кои ја поддржуваат војната во Газа.
Имаше конфронтации и повеќе од 1.000 апсења на студенти кои протестираа.
Судирите во UCLA се случија околу кампот поставен од пропалестинските демонстранти, кои поставија барикади додека контрадемонстрантите се обидуваа да ги урнат. Дел од демонстрантите фрлаа столови и во еден момент група луѓе преплавија лице кое лежеше на земја, клоцајќи го и тепајќи го со стапови.
Се уште не е познат бројот на повредени за време на овие судири.
Градоначалничката на Лос Анџелес, Карен Бас, насилството го нарече „апсолутно одвратно и неоправдано“ и рече дека полицајците од полициската управа во Лос Анџелес биле на местото на настанот откако им било кажано дека универзитетот побарал полициска помош.
Нападот на 7 октомври во јужен Израел од страна на милитантите на Хамас - палестинската група прогласена за терористичка организација од Соединетите Држави и Европската Унија - и последователната израелска офанзива ги предизвикаа најголемите студентски протести во САД од антирасистичките протести во 2020 година.
Пропалестинските демонстранти се собраа и на Сити колеџот во Њујорк, при што универзитетот им нареди да излезат од кампусот, рече заменик-комесарот на њујоршката полиција Каз Датри. Десетици демонстранти се уапсени, објави Њујорк Тајмс.
Датри, исто така, рече дека универзитетот побарал присуство на полиција за да помогне во растерувањето на демонстрантите.
Многу од протестите ширум САД беа дочекани со контрапротести, обвинувајќи ги за поттикнување антисемитизам. Пропалестинската страна, вклучително и Евреите кои се противат на израелските акции во Газа, велат дека неправедно се етикетирани како антисемитисти поради критикување на владата на Израел и изразување поддршка за човековите права.
Прашањето доби политички призвук пред претседателските избори во САД во ноември, при што републиканците обвинија некои универзитетски администратори дека замижуваат пред антисемитската реторика.
Портпаролот на Белата куќа Џон Кирби во вторникот го нарече принудното влегување во зградите на кампусот „погрешен пристап“. /REL
