Парламентот на Шпанија и даде зелено светло на Црна Гора на патот кон членство во НАТО.
Како што соопшти владата на Црна Гора, процесот на ратификација на протоколот за членство во земјите-членки на Алијансата започна уште во јуни 2012 година. Исланд беше првата земја што го ратификуваше протоколот, на 8 јуни минатата година, точно 10 години откако истата земја ја призна независноста на Црна Гора.
Ратификацијата на Северноатлантскиот договор беше едногласно одобрена од собранието на Црна Гора на 28 април годинава. На 1 јуни, по стапувањето на сила на актот на ратификација во Холандија, каде што е завршена процедурата, ќе следи поканата од генералниот секретар Јенс Столтенберг за членство на Црна Гора во НАТО, појаснуваат црногорски владини извори.
Како што предупреди премиерот Душко Марковиќ, Црна Гора гордо ја завршува една од главните цели за развој на модерна и демократска држава. Со депонирањето на инструментите за ратификација, кое е закажано за 5 јуни, Црна Гора и официјално ќе стане 29-та членка на НАТО.
Во минатото, Москва не само што беше остар критичар на влезот на Црна Гора во НАТО, туку често и се закануваше на поранешната југословенска република отворено, преку руски претставници, да не се приклучува на алијансата. На последните избори во Црна Гора имаше обид за државен удар, додека црногорските власти ја обвинија Москва дека стои зад заговорот.
