-
Превод: Блерта Хаџиу
- 3 октомври 2025 14:00 часот
- Споделете на:
Унгарскиот премиер Виктор Орбан изјави во петокот дека не го поддржува членството на Украина во Европската Унија.
„Унгарците не сакаат Украинците да бидат во Европската Унија. Целосно се согласувам со тоа“, изјави тој за државната телевизија на земјата, пренесува АП.
Орбан, кој честопати го блокираше патот на Украина кон ЕУ, рече дека судбината на Украина е да живее покрај Русија, судбина што Унгарија не сака да ја дели.
„Не сакаме заедничка судбина со нив. Нивната судбина е да живеат покрај Русија и постојано да бидат во војна со Русите. Не можеме да го промениме тоа и не помага ако се справиме со сè од што тие страдаат. Сакаме да ја спасиме Унгарија од фактот дека, ако Украинците се приклучат на блокот, и ние ќе бидеме во војна со Русите. Повторно го кажувам: ако сте во истиот систем како друга земја и таа е нападната, порано или подоцна ќе мора да обезбедите војници - а ние тоа не го сакаме. Не сакаме нашите млади луѓе да умираат за Украина.“
Тој додаде дека нема потреба да се грижи за мислењата на другите земји-членки на ЕУ за евентуалното членство на Украина.
Додека повеќето земји од ЕУ му обезбедија политичка, финансиска и воена поддршка на Киев од почетокот на руската инвазија во 2022 година, Унгарија следеше сосема поинаков пристап - одбивајќи да испрати оружје во Украина или да дозволи негово поминување низ унгарска територија, барајќи укинување на санкциите и зближување со Русија, како и заземајќи конфликтен став кон Киев и неговите поддржувачи во ЕУ.
Наместо членство во ЕУ, Орбан предложи „стратешки договор“ меѓу европскиот блок и Украина.
„Предлагам да потпишеме стратешки договор со Украинците за да им помогнеме. Ни треба договор меѓу Европската Унија и Украинците. Таков договор постои со Британците и Турците. Не е без преседан. Но, да не ги внесуваме во ЕУ. Имаме право да го кажеме ова, и без разлика што велат другите, тие не можат да го променат нашето мислење, бидејќи Унгарците, како и секој друг народ, имаат право сами да одлучуваат.“
Тој рече дека ништо нема да му го промени мислењето за ова прашање.