ОН: Иран користи дронови и апликации за фаќање жени без хиџаб

Според извештајот објавен од Обединетите нации во петокот, Исламската Република Иран користи беспилотни летала, системи за идентификација и мобилна апликација за да се осигура дека законот за превезот на жените се спроведува, пишува Си-Ен-Ен.

Извештајот ја истакна зголемената зависност на Иран на технологијата за следење и казнување на жените кои го прекршуваат задолжителниот кодекс на облекување. Централно место во оваа кампања е мобилната апликација „Назер“, алатка поддржана од иранската влада која им овозможува на граѓаните и полицијата да пријавуваат жени за сомнителни прекршувања.

Авторите на извештајот го обвинуваат Иран за систематско кршење на човековите права и злосторства против човештвото, кои особено се насочени кон жените и девојчињата.

Според извештајот, мобилната апликација „Назер“ им овозможува на корисниците да ја прикачат регистарската табличка на возилото, локацијата и времето кога жената не носи вел. Апликацијата потоа електронски го означува возилото, а потоа ја известува полицијата, се вели во извештајот.

Властите, исто така, лансираа беспилотни летала над Техеран и јужниот дел на земјата за да ги испитаат јавните простори и да го „следат спроведувањето на законот“, открија истражителите.