-
Превод: Идеал Жуби
- 22 јули 2025 10:08 часот
- Споделете на:
Светската здравствена организација (СЗО) во понеделник објави дека израелската армија ги нападнала нејзините вработени и нејзиниот главен магацин во градот Деир ал-Балах, загрозувајќи го континуитетот на операциите во Појасот Газа, пишува „Гардијан“.
Претставници на СЗО изјавија дека персоналот во магацинот бил нападнат три пати, при што бомбардирањата предизвикале пожари и голема штета, како и дека ги загрозиле персоналот и нивните семејства.
Дополнително, претставници на СЗО изјавија дека двајца членови на персоналот и двајца членови на нивното семејство се приведени. Според соопштението, тројца од нив подоцна биле ослободени, додека еден член на персоналот останува во притвор.
„Израелската армија влезе во просториите на институцијата, принудувајќи ги жените и децата да се евакуираат пеш кон Ал-Мавас, поради активните судири. Машките вработени и членовите на нивните семејства беа врзани со лисици, соблечени, испрашувани на лице место и претресени под закана со оружје“, се вели во објавата на СЗО.
Во понеделник, израелските тенкови за прв пат навлегоа во јужните и источните населби на градот Деир ал-Балах, област каде што израелски извори тврдат дека е можно да се држат заложници.
Гранатирањето од тенкови во областа погоди неколку домови и џамии, при што загинаа најмалку тројца Палестинци, а неколку други беа повредени, според локалните здравствени претставници.
Во своето дневно ажурирање, Министерството за здравство на Газа во понеделникот соопшти дека најмалку 130 Палестинци се убиени, а повеќе од 1.000 други се ранети од огнено оружје и воени напади низ целата територија во последните 24 часа.
Најмалку 20 Палестинци убиени во израелски напади во Газа
Агенцијата за цивилна одбрана во вторник објави дека во израелските напади загинале најмалку 20 Палестинци во Појасот Газа, додека израелската армија ги проширила копнените операции во централниот град Деир ал-Балах, објави АФП.
Портпаролот на агенцијата, Махмуд Басал, за АФП изјави дека во израелските напади врз кампот ал-Шати западно од градот Газа загинале најмалку 13 лица, а повеќе од 50 се повредени.
Огромното мнозинство од палестинското население било раселено барем еднаш за време на 21-месечниот конфликт, а кампот ал-Шати, на брегот на Средоземното Море, сместил илјадници раселени лица од северот на енклавата.
Басал објави дека уште две лица ги загубиле животите во Деир ал-Балах, каде што израелскиот воен штаб објави дека ќе ги прошири копнените операции, однапред наредувајќи евакуација на поголемиот дел од областа.
Канцеларијата на Обединетите нации за координација на хуманитарни прашања (OCHA) процени дека во областа, која досега се сметаше за релативно безбедна, живеат помеѓу 50,000 и 80,000 луѓе. Околу 30,000 од нив престојуваат во засолништа за раселени лица.
ОЦХА објави дека речиси 88 проценти од целиот Појас Газа сега е или под наредба за евакуација или во израелски милитаризирани зони, принудувајќи го населението од 2.4 милиони да се натрупа во сè потесни простори.