Алкохолот што се продава во Европската унија мора да носи предупредување за поврзаноста помеѓу консумирањето алкохол и ракот, се вели во соопштението на европската филијала на Светската здравствена организација (СЗО) објавено од нејзината канцеларија во Копенхаген.
Неодамнешните истражувања покажуваат дека „свеста на Европејците за врската помеѓу алкохолот и ракот треба да се зголеми и може значително да се подобри со ставање здравствени предупредувања на информациите за алкохолот како причина за рак на дојка и дебелото црево“, се вели во соопштението.
СЗО соопшти дека предупредувањата за одредени видови на рак се со поголема веројатност да поттикнат дискусии за ризиците од алкохолот и да ги охрабрат луѓето да размислат дали да пијат алкохол.
СЗО соопшти дека студијата од 2019 година покажала дека потрошувачката на алкохол по глава на жител во ЕУ била двојно поголема од светскиот просек, и дека еден од 19 возрасни лица умира од причини што му се припишуваат на алкохолот, а три од 10 луѓе развиле рак поради алкохол.
Европејците постари од 15 години консумирале 9.2 литри чист алкохол по глава на жител, што е многу повеќе од светскиот просек од 5.5 литри, соопшти здравствената организација.
Според неа, околу 800.000 луѓе умираат во европскиот регион од причини поврзани со консумирање алкохол - речиси 2.200 дневно - при што ракот е најчеста причина за смрт, додека јавната свест за оваа врска е прилично ниска. /REL
