-
Превод: Флутура Гаши-Мехмети
- 17 јуни 2025 година, 21:19 часот
- Споделете на:
Германскиот канцелар Фридрих Мерц изрази почит кон нападот на Израел врз Иран, нарекувајќи го услуга на западните сојузници.
„Ова е валканата работа што Израел ни ја прави на сите нас“, рече Мерц во вторникот на маргините од самитот на Г7 во Канада во интервју за германскиот радиодифузер ZDF.
„Ние сме исто така жртви на овој режим. Режимот на овој мула донесе смрт и уништување во светот“, додаде тој.
„Можам само да кажам: најголема почит кон фактот што израелската армија и израелското раководство имаа храброст да го сторат ова.“
Мерц додаде дека нападите на Израел врз Иран би можеле да доведат до соборување на раководството на Исламската Република.
„Претпоставувам дека нападите од последните денови веќе значително го ослабнаа режимот на мулите и дека е малку веројатно дека ќе се врати на претходната сила, што ја прави иднината на земјата неизвесна“, рече Мерц во интервју за германската телевизија Велт на самитот на Г7 во Канада.
Иранските власти пријавија 224 смртни случаи, претежно цивили, во напади за кои велат дека цел биле воени претставници и нуклеарни научници.
И Израел вели дека 24 цивили се убиени во иранските напади на негова територија.
Германија остана еден од најголемите поддржувачи на Израел, па дури и интервенираше во име на Израел во случајот за геноцид во Јужна Африка пред Меѓународниот суд на правдата (МСП).
