Шефицата за надворешна политика на Европската унија, Каја Калас, изјави во вторникот дека земјите-членки на блокот се блиску до постигнување договор што предвидува воведување нови санкции против Русија.
„Се надеваме дека ќе постигнеме политички договор за 18-тиот пакет санкции. Многу, многу сме блиску. Се надевам дека ќе можеме да се согласиме денес“, изјави Калас пред состанокот со министрите за надворешни работи на 27-те земји-членки на ЕУ во Брисел.
Неколку извори за новинската агенција Ројтерс изјавија дека еден ден претходно е постигнат прелиминарен договор за сите елементи од пакетот, иако една земја-членка и понатаму има резерви во врска со предлогот за намалување на горната цена за руската нафта.
„Живо е“, рече Калас за горната цена.
„Дадовме предлози, но дилемата е дали можеме да го надминеме ветото на земја-членка. Но, ние работиме во оваа насока“, додаде таа.
исто така
Европската комисија со нов пакет санкции против Русија, забрзана е забраната за руски гас
Европската комисија минатиот месец го предложи 18-тиот пакет санкции против Русија, чија цел е да ги погоди приходите од рускиот енергетски сектор, банките и воената индустрија.
Новиот пакет, исто така, предлага забрана за трансакции со рускиот гасовод „Северен тек“, како и со банки вклучени во избегнување на санкции.
