Поранешниот премиер на Велика Британија, Борис Џонсон изјави дека претседателот на Русија, Владимир Путин, му се заканувал со ракетен напад преку „вонреден“ телефонски повик, во пресрет на руската агресија врз Украина.
Како што објави Би-Би-Си во неделата, Џонсон рече дека заканата дошла кога рекол дека „војната би била целосна катастрофа“ за време на „многу долг телефонски разговор во февруари 2022 година“.
Детали за размената на пораки се откриени во документарецот на Би-Би-Си во кој се испитуваат интеракциите на Путин со светските лидери.
Поранешниот британски премиер го предупреди Путин дека инвазијата на Украина ќе доведе до санкции од Западот и повеќе војници на НАТО на руските граници.
„Тој ми се закани во еден момент и ми рече: Борис, не сакам да те повредам, но со ракета ќе ми треба само една минута или нешто слично. Но, мислам дека од тонот на неговиот глас, тој беше многу мирен... Тој само си играше заедно со моите напори да го натерам да преговара“, рече Џонсон.
