Израел нападна болница во која се вакцинираат деца, соопштија палестинските власти

Палестинските власти соопштија дека Израел извршил напад со беспилотно летало врз клиника во северниот дел на Газа каде што децата се вакцинираат против детска парализа, при што биле повредени шест лица, меѓу кои четири деца. Израелската армија го негира ова.

Наводниот напад се случи во саботата во северниот дел на Газа, кој беше опколен од израелските сили и во голема мера изолиран изминатава година. Израел изврши уште една офанзива таму во последните недели во која загинаа стотици луѓе, а десетици илјади се раселени, пренесува АП.

Израелските сили постојано ги напаѓаа болниците во Газа за време на војната, велејќи дека Хамас ги користи за милитантни цели, наводи кои ги негираа палестинските здравствени власти.

Др. Мунир ал-Бурш, генерален директор на Министерството за здравство во Газа, изјави за Асошиетед прес дека израелската војска ја нападнала клиниката Шеик Радван во градот Газа рано попладне во саботата, само неколку минути откако делегација на Обединетите нации го напуштила објектот.

Светската здравствена организација и Детската агенција на ОН, позната како УНИЦЕФ, кои заеднички ја водат кампањата за вакцинација против детска парализа, изразија загриженост поради пријавениот напад.

„Извештаите за овој напад се уште повознемирувачки бидејќи клиниката Шеик Радван е една од здравствените точки каде родителите можат да ги вакцинираат своите деца“, рече Росалија Болен, портпаролка на УНИЦЕФ.

„Денешниот напад се случи додека се уште беше во сила хуманитарната пауза, и покрај дадените гаранции дека паузата ќе се почитува од 6 до 16 часот“, додаде таа.

Кампањата за втората доза од вакцината против детска парализа започна во саботата во делови од северниот дел на Газа. 

Тоа беше одложено од 23 октомври поради недостиг на пристап, израелско бомбардирање, наредби за масовна евакуација и немање гаранции за хуманитарни паузи, се вели во соопштението на ОН.