-
Превод: Флутура Гаши-Мехмети
- 9 јуни 2025 година, 10:52 часот
- Споделете на:
Новата забрана на Доналд Трамп за патување во САД за граѓани на 12 земји, претежно од Африка и Блискиот Исток, стапи на сила во понеделник во 12:00 часот по источно време, повеќе од осум години откако првата забрана за патување на Трамп предизвика хаос, конфузија и месеци правни битки.
Новата наредба, која Трамп ја потпиша минатата недела, „целосно“ го ограничува влезот во САД за граѓаните на Авганистан, Бурма, Чад, Република Конго, Екваторска Гвинеја, Еритреја, Хаити, Иран, Либија, Сомалија, Судан и Јемен. Влезот за граѓаните на Бурунди, Куба, Лаос, Сиера Леоне, Того, Туркменистан и Венецуела ќе биде делумно ограничен, објавува „Гардијан“.
За разлика од првата забрана за патување на Трамп во 2017 година, која првично беше насочена кон граѓани на седум земји со муслиманско мнозинство и беше критикувана како неуставна „муслиманска забрана“, новата забрана е поширока, а правните експерти рекоа дека очекуваат таа да издржи правни предизвици.
Објавувањето на новата забрана за патување беше дочекано со помалку гнев и протести отколку неговата првична забрана од 2017 година.
Но, новата забрана е засенета од другите битки на Трамп за имиграцијата, вклучувајќи ги и жестоките протести во Лос Анџелес поради рациите за депортација на Трамп, по што Трамп ја распореди Националната гарда во градот и покрај противењето на гувернерот на Калифорнија.
Новововедената забрана конкретно ги опфаќа граѓаните на Хаити, земја со христијанско мнозинство.
Хаиќаните во САД беа демонизирани од Трамп за време на неговата претседателска кампања, кој ја ширеше неоснованата теорија на заговор дека хаитските имигранти во Охајо јадат домашни миленици.
Исто така, се наметнуваат зголемени ограничувања за патување на венецуелските граѓани, кои постојано беа цел на Белата куќа во последните месеци, откако ненадејната депортација на Венецуелци во САД од страна на администрацијата на Трамп во озлогласен затвор во Ел Салвадор предизвика голема правна битка.
Се очекува забраната да има непропорционален ефект и врз африканските земји, бидејќи некои граѓани на засегнатите земји се загрижени дека ќе бидат лишени од можности за образование, професионален развој и вмрежување.
