-
Превод: Флутура Гаши-Мехмети
- 27 мај 2025 17:35 часот
- Споделете на:
Турскиот претседател Реџеп Таип Ердоган во вторник објави дека назначил тим од правни експерти кои ќе започнат со работа на нов устав, за кој критичарите велат дека би можел да му овозможи да остане на власт и по 2028 година, кога ќе му заврши мандатот.
Ердоган, кој ја води Турција како претседател од 2014 година, а беше премиер повеќе од една деценија пред тоа, го бранеше новиот устав, тврдејќи дека сегашниот, кој беше изготвен по воениот удар во 1980 година, е застарен и задржува елементи на воено влијание, иако е изменет неколку пати, објави АП.
„Од вчера, назначив 10 правни експерти да ја започнат својата работа и со овој напор ќе продолжиме со подготовките за новиот устав“, им рече Ердоган на локалните администратори на неговата владејачка партија во говорот.
„23 години постојано ја покажувавме нашата искрена намера да ја крунисаме нашата демократија со нов граѓански и слободољубив устав“, додаде Ердоган.
Според сегашниот устав, Ердоган не може повторно да се кандидира освен ако не се распишат предвремени избори или не се промени законската рамка.
Критичарите го гледаат притисокот за нов устав како потенцијален пат кон повторен избор, дозволувајќи законски измени што би ги заобиколиле уставните ограничувања на мандатот.
Ердоган, кој со текот на годините станува сè поавторитарен, негираше дека бара нов устав за да остане на власт, велејќи минатата недела дека „го сакаме новиот устав не за себе, туку за нашата земја“.
Владејачката партија на Ердоган и нејзините националистички сојузници немаат гласови потребни за воведување на нов устав.
Некои аналитичари веруваат дека најновиот обид на владата да го прекине деценискиот конфликт со милитантната Курдистанска работничка партија (ПКК) е дел од стратегијата за добивање поддршка од прокурдска партија во парламентот за новиот статут.
Обидот за воведување нов устав доаѓа неколку месеци откако Екрем Имамоглу, популарниот градоначалник на Истанбул и главен ривал на Ердоган, беше уапсен и затворен под обвинение за корупција.
Неговото апсење е широко оценето како политички мотивирано иако владата инсистира дека турското судство е независно и ослободено од политичко влијание.
Апсењето и последователното затворање предизвикаа масовни демонстрации со кои се бара негово ослободување и крај на демократскиот пад на Турција под водство на Ердоган.
