Свињите, уште една жртва на енергетската криза во Германија

Бројот на свињи во Германија е на рекордно ниско ниво бидејќи фармерите се борат со зголемените трошоци за размножување. Ова е последица на енергетската криза во една од најразвиените земји во светот, пишува CNN.

Федералното биро за статистика (Дестатис) објави дека резервите на свињи, како и бројот на свињи на фармите, се намалени поради тешката економска ситуација. Тие посочија дека поскапувањето на енергенсите, ѓубривата и добиточната храна го поскапило производството.

До 3 ноември се регистрирани 21.3 милиони свињи, што е за 10 отсто помалку од пред една година и за 20 отсто помалку од 2020 година. Дестатис истакна дека ова е најмалиот број на свињи во историјата на Германија.

Во Германија годинава има 1900 фарми помалку, додека ова намалување од 2020 до 2021 година изнесува 1600. Според податоците од октомври оваа година, последниот месец за кој се достапни податоци, трошоците за производство се зголемени за близу 47 отсто во споредба со истиот период минатата година.

И овие податоци покажуваат дека германската индустрија страда од поскапувањето на енергенсите кое започна по руската агресија врз Украина. Многу производители во енергетски интензивни сектори, вклучително и хемиската индустрија, го намалија производството, додека некои отпуштаат работници и/или преселуваат операции во странство за да ги намалат оперативните трошоци.

Економистот на Дојче банк, Марк Шатенберг изјави дека два милиони германски работници би можеле да бидат принудени да одат на одмор на пролет поради зголемените цени на енергијата и можниот недостиг на гас.