Европските аеродроми предупредуваат на криза со горивото - што влијае на летните патувања

Шефот на Меѓународниот совет на аеродроми на Европа, Оливие Јанковец, ја предупреди Европската Унија за „системски недостиг на гориво за авиони“ што би можел да заврши во рок од три недели поради блокадата на Ормутскиот теснец.

Јанковец, во писмо до кое дојде Асошиејтед Прес, вели дека оваа криза може да влијае на летната туристичка сезона и „значително да ја оштети европската економија“.

Тој ја повика Европската Унија да организира колективни набавки на гориво за авиони за европските земји, да ги следи залихите и да идентификува алтернативни извори на гориво, меѓу другите мерки.

Работната група за енергија на Европската унија соопшти дека нема „непосреден ризик за безбедноста на снабдувањето со нафта и гас“ од конфликтите на Блискиот Исток и нема потреба од ослободување дополнителни залихи.

Сепак, предупреди за можноста за долгорочни ризици и додаде дека „авионскиот бензин останува главна грижа“ поради зависноста од увоз.