Четиринаесет лица загинаа во удар на гром во бегалски камп во северна Уганда, соопшти во неделата полицијата.
Инцидентот се случил во саботата во оддалечениот кварт Ламво. Портпаролот на полицијата Китума Русоке изјави дека се повредени уште 34 лица. Жртвите се уште не се идентификувани, пренесува АП.
Жителите на населениот камп Палабек, во кој се сместени претежно бегалци од Јужен Судан, присуствувале на молитва во импровизираната метална конструкција кога удрил гром.
Смртоносните молњи најчесто се пријавуваат во оваа источноафриканска земја за време на влажните сезони.
