Ford Motor Co. вели дека ќе ја намали својата работна сила за 4,000 во Европа и во Велика Британија до крајот на 2027 година.
Компанијата ја оправда одлуката со притисокот од зголемената конкуренција и послабата од очекуваната продажба на електрични автомобили, пренесува АП.
Форд во средата соопшти дека најголемиот дел од кратењето на работните места ќе бидат направени во Германија и ќе бидат спроведени во консултација со претставниците на вработените.
Од вкупната работна сила на компанијата, 2,900 работни места ќе бидат укинати во Германија, 800 во Британија и 300 во другите земји од Европската унија. Форд има 28,000 вработени во Европа и 174,000 ширум светот.
„Глобалната автомобилска индустрија продолжува да биде во период на значителни нарушувања додека преминува кон електрифицирана мобилност“, се вели во соопштението на компанијата.
Во Европа, производителите на автомобили мора да продадат доволно електрични возила за да ги исполнат новите, пониски граници за просечна емисија на јаглерод диоксид и да ја исполнат долгорочната цел на ЕУ до 2035 година за намалување на емисиите на нула, што би значело елиминирање на повеќето возила со мотори со внатрешно согорување.
Сепак, продажбата на електрични возила делумно е запрена поради тоа што потрошувачите уморни од инфлација ја ограничија потрошувачката.
Компанијата, исто така, најави дека ќе го намали работното време за работниците во својата фабрика во Келн, Германија, каде што ги произведува електричните возила Капри и Експлорер.
