Албанија до Зеленски во Србија: Им служи на интересите на Украина, Косово има своја реалност

Албанското Министерство за надворешни работи реагираше на посетата на украинскиот претседател Володимир Зеленски на Србија и средбата со српскиот претседател Александар Вучиќ. Во одговорот на Министерството за надворешни работи се наведува дека посетата на претседателот Зеленски на Србија, пред сè, им служи на интересите на Украина.

Во реакцијата се наведува дека Албанија стои зад територијалниот интегритет на Украина исто како што стои зад суверенитетот и независноста на Косово. Според албанското Министерство за надворешни работи, секој чекор што ѝ помага на Србија да се оддалечи од влијанието на Русија и да се приближи до Европа е позитивен. 

За време на престојот во Србија, Зеленски тврдеше дека тие немаат намера да го признаат Косово.

Понатаму се наведува дека мирот на Западен Балкан и прифаќањето на независноста на Косово како неповратна реалност се од суштинско значење.

„Исто така, цврсто стоиме на ставот дека Србија и Косово припаѓаат на заедничка европска иднина. Нормализацијата на нивните односи, што на крајот треба да доведе до меѓусебно признавање, нема да ја ослабне Србија. Напротив, тоа би помогнало да се затвори едно од најболните поглавја во поновата историја на нашиот регион и да се отвори патот за вистинско помирување, добрососедски односи и траен мир. На Западниот Балкан му е потребна оваа позитивна енергија денес, можеби повеќе од кога било. Посетата на претседателот Зеленски на Србија, пред сè, им служи на интересите на Украина. Ова е разбирливо и легитимно“, се вели во одговорот, меѓу другото.

За време на посетата на Србија, украинскиот претседател Володимир Зеленски изјави дека ставот на неговата земја за непризнавање на Косово како независна држава не е променет и дека го почитува територијалниот интегритет на Србија.

Косово е една од земјите што постојано ѝ дава поддршка на Украина од почетокот на војната со Русија во 2022 година. Косово се согласи да прими украински бегалци, започна програма за украински новинари, воведе санкции против Русија и обезбеди хуманитарна и медицинска помош.