Поранешниот портпарол на НАТО Џејми Шеј ја нарече охрабрувачка декларацијата за воена соработка меѓу Косово, Хрватска и Албанија.
Тој рече дека договорот што го потпишаа министрите за одбрана на трите земји не е насочен против Србија.
„Трите земји јасно ставија до знаење дека нивниот договор за одбрана не е насочен против Белград, туку е дизајниран да ја зголеми соработката меѓу нив. Значајно е што другите земји во регионот брзо покажаа интерес да се приклучат на трилатералниот договор. Охрабрувачки е што земјите од регионот преземаат поголема одговорност за сопствената безбедност и тоа го прават помагајќи си една на друга“, изјави Шеј за јавната телевизија.
Трите земји го потпишаа договорот за воен сојуз на 18 март во Тирана. А во саботата беше објавен целосниот текст на договорот.
За овој договор имаше бројни реакции од Србија. Српскиот претседател Александар Вучиќ изјави дека ова е прекршување на подрегионалниот договор за контрола на оружјето од 1996 година. Но, официјални лица од Косово, Албанија и Хрватска негираа дека овој договор е непријателски по природа кон соседите.
