Амбасадорот на Србија во Соединетите Американски Држави, Марко Ѓуриќ, изјави дека предупредувањето на Косово за враќање на мерките за реципроцитет е јазик на ултиматуми и уцени, кои според него се поопасни од заканите.
Ѓуриќ за „Политика“ изјави дека српската држава и претседателот Александар Вучиќ, „кои се решени за конструктивен дијалог, сигурно нема да дозволат Курти или друг албански лидер да воведуваат јазик на закани и уцени“.
Неговата изјава доаѓа веднаш откако Владата на Курти најави враќање на мерката за реципроцитет.
Пред една година, Албин Курти беше премиер кога неговата влада ја укина царината за српските стоки и ја замени со мерка на реципроцитет. Но, ова го чинеше пад од тронот. Два дена пред изборите на 14 февруари, Курти вети дека веднаш штом ќе се врати на власт, веднаш ќе го воспостави реципроцитетот што го отстрани Владата на Хоти.
„Реципроцитетот е право што произлегува од еднаквоста и суверенитетот, односно да се биде независен, со цел да се заштитат граѓаните од самоволно однесување или повреда на правата и достоинството од страна на други држави. Обврска на Владата и премиерот Курти е да ги штитат граѓаните на Републиката и интересите на државата Косово. Затоа, ќе има мерки на реципроцитет со секоја земја, вклучително и со Србија, во секоја област каде што има еднострани дејствија, кои го нарушуваат принципот на еднаквост и потпишаните договори“, изјави пред неколку дена Перпарим Криезиу, портпарол на Владата. ВРЕМЕ.
