Претседателката на Косово, Вјоса Османи, доби благодарница од турскиот претседател Реџеп Тајип Ердоган за помошта што тимот за пребарување и спасување на Косово ја понуди за спасување на животи по разорните земјотреси во Турција.
„Би сакал да ви се заблагодарам во името на мојата нација и моето лично име што ја споделивте нашата болка и за кратко време дадовте поддршка преку испраќање порака на сочувство за земјотресите во Кахраманмараш, кои директно зафатија десет провинции со разорна моќ што предизвика длабока болка за нашата земја. Фактот што пријателските земји стојат покрај нас во вакви случаи на природни катастрофи ни дава сила да издржиме“. се вели во писмото на Ердоган, соопшти Претседателството на Косово.
Понатаму во писмото на претседателот Ердоган се вели дека Република Косово дала голем придонес за луѓето кои се борат со шокантните последици од земјотресот.
„Вашата помош даде огромен придонес за нашиот народ кој се бори со шокантните последици од земјотресот во овие тешки зимски денови. Напорите на вашиот тим за пребарување и спасување да ги спаси животите на луѓето заробени во урнатините секогаш ќе се паметат со благодарност. Во оваа прилика ги повторувам моите најдобри желби за вашето здравје и среќа, како и за благосостојбата и просперитетот на пријателскиот и братски народ на Косово“, се вели во писмото на турскиот претседател.
