Се бара истрага за причините за кризата во Телеком

Телеком со образложение дека му е потребен за техничко одржување, за отплата на долгови кон изведувачите и за оперативни трошоци, од Владата на Косово побарал 5 милиони евра. Во оправданоста на барањето се вели дека со оваа сума пари се обезбедува нормално работење на претпријатието.

Предлогот за доделување 5 милиони евра за Телеком беше на дневен ред на седницата на Владата во среда. Но, на барање на вршителот на должноста министер за финансии, Лулзим Рафуна, таа е одложена за друга средба. Тој побара појаснување од Министерството за економски развој дали оваа сума е предвидена во неговиот буџет за 2020 година, пишува денеска „Коха диторе“.

„Го чекав министерот за економски развој да ми даде објаснување, не знам од каде ни се парите кога работиме со 1/12 од буџетот. Ако тоа било наменето за буџетот за 2020 година, тогаш нешто друго“, потенцира Рафуна.

Додека Владата го разгледува барањето, економски експерти велат дека и да има средства, неразумно би било да се доделат на Телеком. Еден од нив, Мустафа Кадриај, рече дека наместо да се трошат даноците на граѓаните за ова претпријатие, потребно е да се покренат истраги против раководството и Управниот одбор за настанатата состојба во Телеком.

(Целиот напис можете да го прочитате денеска во „Коха диторе“)