Хоти: Пред пет години бевме во Белата куќа, денес стратешкиот дијалог е суспендиран

Поранешниот премиер на Косово, Авдулах Хоти, а сега пратеник на Демократската лига на Косово, реагираше откако амбасадата на САД во Косово објави дека го прекинува стратешкиот дијалог со Косово, поради изјавите на вршителот на должноста премиер, Албин Курти. 

„Штета. Пред пет години бевме во Белата куќа. Денес дијалогот за стратешко партнерство меѓу Косово и САД е суспендиран. Косово не заслужува ова лидерство. Косовските лидери се зафатени со дебати и навреди кон новинарите, бизнисите и политичките партии кои не ги следат по стапките на државата“, напиша Хоти. 

Амбасадата на Соединетите Американски Држави во Приштина во петокот објави дека Вашингтон го суспендирал стратешкиот дијалог со Косово на неодредено време.

Во соопштението се вели дека одлуката е донесена поради постапките на актуелната влада, кои, според САД, ги зголемија тензиите и нестабилноста, отежнувајќи ја соработката околу заедничките приоритети.

„Остануваме посветени на унапредување на заедничките интереси што ги делат Соединетите Американски Држави и народот на Косово. Нашиот однос со Косово се темели на заедничка цел: зајакнување на мирот и стабилноста како основа за заеднички економски просперитет. За жал, постапките и изјавите на вршителот на должноста премиер Курти претставуваа предизвици за напредокот постигнат во текот на годините“, се вели во соопштението на амбасадата.