Харадинај: Најголемиот буџет во историјата на Косово ќе му претходи на економскиот раст од 4.7 отсто

Косовскиот премиер Рамуш Харадинај по гласањето за Буџетот за 2019 година изјави дека со најголемиот буџет во својата историја, Косово влегува во нова развојна фаза.

„Го поздравувам одобрувањето во второ читање на Предлог-законот за Буџетот на Република Косово за 2019 година. Со 2 милијарди и 370 милиони евра ова е најголемиот и најразвоен буџет на Косово досега, кој ќе му претходи на економскиот раст од 4.7 отсто. Образованието со околу 300 милиони евра и здравството со 234 милиони, се секторите кои имаат најголема корист. Институциите за владеење на правото и одбраната добиваат зголемена финансиска поддршка од 6 отсто во однос на ланскиот буџет. Повеќе сигурност и поголема заштита, како за граѓаните, така и за инвестициите. Капиталните инвестиции се зголемени за 11%, или 75 милиони во однос на 2018 година, што овозможува реализација на многу постоечки и нови проекти, како голем поттик за економски развој и за приватниот сектор. Сместени се средствата за зголемување на основните пензии за 20%, за придонесите за 15%, како и месечните пензии од 230 евра за жртвите на сексуалното насилство за време на војната“, рече Харадинај.