Директорот на Канцеларијата за Косово во Владата на Србија, Марко Ѓуриќ утрово изјави дека новата влада на Косово е првата која ќе зависи од гласовите на Србите и дека нема да може да опстане доколку Србите, во политичка смисла, се малтретирани.
Ѓуриќ потсети дека Србите ќе имаат 10 заменици и тројца министри, еден повеќе од претходно, оценувајќи за српската телевизија „Пинк“ дека Србите на Косово никогаш немале толкава политичка моќ.
Според неговите зборови, тоа е резултат на тоа што тие се обединиле и функционираат во координација „со својата земја“, пренесува Коха.нет.
Тој рече дека ова е важно за подобрување на состојбата на српскиот народ, оценувајќи дека преземањето на Министерството за земјоделство е многу важно за Србите во Косово бидејќи „таму 85 отсто од луѓето живеат во села и главно се занимаваат со земјоделство“. .
„Србија ја поддржа Српската листа, бидејќи смета дека Србите на Косово најдобро ги знаат своите интереси“, повтори Ѓуриќ, додавајќи дека „српскиот народ чека други битки за подобрување на ситуацијата во покраината“ и дека за ова „ тие секогаш ќе имаат поддршка од државата“.
Нема да ги оставиме како псевдоопозиција“, нагласи тој.
Тој рече и дека односот на Србија кон новиот косовски премиер Рамуш Харадинај не е променет и дека Србија ќе продолжи да бара негова екстрадиција.
И покрај говорот на Харадинај на српски јазик во косовскиот парламент, Ѓуриќ рече дека не верува во неговата искреност, додавајќи дека „знам колку е тешко за нашиот народ кој ќе мора да се соочи со Харадинај“.
