Американскиот пратеник Габриел Ескобар и специјалниот претставник на ЕУ, Мирослав Лајчак, по завршувањето на тридневната посета на Косово, вечерва престојуваат во посета на Србија, како дел од напорите за продолжување на процесот на дијалог.
Во оваа прилика, тие се сретнаа со претседателот на Србија, Александар Вучиќ, на кого му ја пренесоа пораката дека ЕУ и САД имаат иста визија за процесот на дијалог и дека нивните напори се насочени кон постигнување сеопфатен договор.
Ескобар и Лајчак ја изразија својата поддршка за продолжување на конструктивниот дијалог, како и за интеграција на Западен Балкан во ЕУ, нагласувајќи дека од суштинско значење е двете страни да ги исполнат сите обврски.
Лајчак рече дека ЕУ и САД тесно соработуваат и споделуваат иста визија за процесот на дијалог и иднината на целиот регион во ЕУ, додавајќи дека нивните напори имаат за цел да постигнат сеопфатен договор и имплементација на сите претходни потпишани договори.
Во меѓувреме, претседателот Вучиќ ја критикуваше косовската страна „за еднострани провокации и нереални очекувања од посредниците во дијалогот“.
Тој изрази уверување дека само со одговорни напори на двете страни во дијалогот може да се дојде до компромисно решение, а заеднички јазик во интерес на Србите и Албанците.
