Надворешната политика на Косово одразува одредени разлики во ставовите за различни прашања, што, според политичките аналитичари, може да донесе големи последици за земјата.
Аналитичарот Имер Мушколај вели дека државните прашања треба да бидат обединувачки, институционално, а не лично.
„Надворешната политика и воопшто институциите на земјата за жал страдаа од некоординираност во одредени случаи, било кога станува збор за бројот на признанија или за институционалниот пристап што треба да го има земјата. Многу од прашањата се повеќе адресирани на лично ниво отколку на институционално ниво. Се разбира, ова е штетно за државата и не треба да се случува вака“, рече Мушколај.
Пример за немање единствени позиции и усогласување во надворешната политика е забележан деновиве, кога шефот на дипломатијата на Косово, Беџет Пацоли учествуваше на министерската конференција на земјите од Организацијата за исламска соработка, што се одржа во Бангладеш.
Една од трите цели на учеството на оваа конференција, според Пацоли, била „апликацијата на Косово за статус на земја набљудувач во оваа организација“.
исто така
Емир Абраши за надворешната политика на Косово: Пасивна и без визија
Од друга страна, заменик министерот за надворешни работи, Ѓерѓ Дедај, предупреди на неотповиклива оставка, доколку Косово влезе во оваа организација, како што рече, без дебата во Собранието на Косово и во МНР.
Дедај во разговор за Радио Слободна Европа вели дека тоа нема никаква врска со спротивставување на политиката на министерот Пацоли, ниту со некоја друга меѓуверска полемика на Косово, туку дека според него главната агенда на Косово е пријателството и партнерството со САД во, членство во НАТО и што поскоро интеграција во Европската Унија.
„Како заменик министер за надворешни работи во Владата на Косово останувам поддржувач на почитувањето на агендите и приоритетите на Косово. А за нас, агендата, приоритет е членството на Косово во Европската Унија, НАТО, ИНТЕРПОЛ, УНЕСКО и во сите други институции кои немаат префикси или фиксни простории, било да се исламски или христијански. Зашто, Косово го нема тој луксуз поради конфесионалниот состав и структура во Косово, да ги стави агендите пред членството во НАТО и во Европската Унија“, рече Дедај.
Од друга страна, Емруш Ујкани, професор по европско право, за Радио Слободна Европа вели дека ваквите контрадикторни изјави не носат позитивни ефекти во напредокот на државноста на Косово и неговото признавање на меѓународната сцена.
„Ова најдобро покажува колкава е координацијата во надлежните институции. На конференцијата на Организацијата за исламска соработка има гости од други земји во светот и на тоа не треба да се гледа со критичко око“.
„Има земји кои го признаа Косово и на Косово му треба соработка и со оваа организација. Ова не значи интегрирање во неа, туку да се бара поддршка од оваа организација“, потенцира Ујкани.
Во меѓувреме, Имер Мушколај вели дека изјавите, како оние на заменик министерот Дедај, можат да имаат штетни последици за Косово во надворешниот план. Според него, Косово како држава во својата надворешна политика треба јасно да дефинира во кои организации треба да се приклучи, а во кои не.
„Од друга страна, треба да се види интересот дали членството во која било организација што можеби не е ориентирана кон евроатлантските вредности може да биде од корист за земјата, во смисла на признание и во смисла на соработка. На крајот, Косово не може да функционира изолирано. Треба да биде добредојдена соработката со која било организација што може да има корист за државата“, рече Мушколај.
исто така
Палокај: Косово има искуство дека дури и кога било во право, се соочувало со последици за своите постапки.
Дури и во минатото се забележани некои нејаснотии во надворешната политика на Косово и бројот на меѓународните признавања. До неодамна, различни институции изнесуваа различни бројки за бројот на признанија. Но, засега ова прашање е надминато.
На официјалната веб-страница на Министерството за надворешни работи на Косово е наведено дека „Република Косово има обезбедено 116 признавања“ и дека „меѓународното признавање на независноста и суверенитетот на Косово ќе остане приоритет на Министерството за надворешни работи. “.
