Бегај бара од албанските амбасадори да работат за Косово

Претседателот на Албанија Бајрам Бегај изјави дека Косово треба да биде поддржано во секоја околност и ситуација и дека должност на Албанија е да работи за членство на Косово во меѓународните организации. 

На средбата со амбасадорите и генералните конзули на државата, Бегај истакна дека благодарение на нив Албанија успеала да ја зајакне својата позиција на меѓународната сцена. 

„Нашата дипломатија мора да ја продолжи безусловната поддршка за Косово. Косово треба да биде поддржано кога и каде и во која било околност или ситуација. Наша должност е да работиме за членството на Косово во меѓународните и регионалните организации, како и за негово ново признавање“, нагласи тој.

Бегај побара од албанските амбасадори и конзули да останат блиску до Албанците, велејќи дека „од вас очекувам активна улога во сугерирање на простори за дипломатско дејствување, како што очекувам и реална и директна комуникација и информирање за случувањата во земјите или регионите. што го покривате“. / Топ канал