Лидерот на ЛДК, Лумир Абдиџику, напиша писмо до претседателката на Европската комисија, Урсула фон дер Лајен. Во писмото се бара итно и целосно укинување на казнените мерки на Европската унија против Косово.
Според ЛДК, продолжувањето на овие мерки е неоправдано и како такво произведува директни последици за граѓаните на Косово.
„Демократската лига на Косово (ЛДК) бара итно укинување на казнените мерки на Европската Унија против Република Косово. ЛДК оценува дека продолжувањето на овие мерки е неоправдано и не ги одразува моменталните политички и институционални случувања во земјата. Мерките на Европската Унија произведуваат директни последици за граѓаните на Косово и им штетат на државните институции. Локалната самоуправа во Република Косово во северните општини е веќе префрлена и критериумите утврдени од ЕУ се исполнети“, се вели во соопштението на ЛДК во врска со писмото.
Во барањето на ЛДК понатаму се наведува дека овие мерки им наштетиле на граѓаните на Косово, а не на неговите политичари. Како резултат на тоа, значителен број проекти останале блокирани.
Пред неколку дена, лидерот на ПДК, Бедри Хамза, во име на партијата што ја предводи, напиша писмо до претседателката на Европската комисија, Урсула фон дер Лајен, во кое побара итно укинување на мерките на ЕУ против Косово.