Arbëri

“Kalabria” e Prishtinës pa çerdhe, pa ngrohje e me kolektor të papërfunduar

Ndërtesa të larta e të reja e karakterizojnë njërën pjesë të lagjes Kalabria, ndërsa shtëpitë pjesën tjetër.

I përzier është edhe relievi i saj, njëherë i rrafshët e pastaj kodrinor.

Kësaj pjese të kryeqytetit, që njihet edhe si “Emshir”, që nga paslufta, krahas ndërtesave, i janë shtuar edhe banorët, raporton emisioni 038 në KTV.

E problemi i parë që e thonë këta të fundit, me të mbërritur në lagje, është ngecja në punimet për kolektorin e ujërave të zeza – tash e disa vite.

Të frustruar nga kundërmimi i përditshëm i lumit Mat, banorët thonë se më nuk mund të durojnë dhe e kanë një kërkesë sfiduese për kryetarin e Prishtinës.

Një grua që i mban hundët e mbyllura për shkak të erës thotë, “Nuk di çka me bo mo, e kemi veç një lutje, le të vjen kryetari le të rrin veç 15 minuta qitu!”.

“7 marsi” është shkolla e vetme në këtë lagje, ndërsa afër saj është edhe Qendra e Mjekësisë Familjare, raporton emisioni 038 në KTV.

Por në “Kalabri” nuk ka asnjë çerdhe publike.

Në pjesën më të madhe të lagjes nuk kalojnë as autobusët urbanë.

Në rrugët e lagjes nuk mungojnë as gropat dhe pusetat e hapura.

Shumica e tyre janë të përkohshme - me kubëza, e pa trotuare.

Ndërsa edhe aty ku ka, trotuaret shërbejnë si vendparkim i veturave.

E edhe pse nga aty shihet “simboli” i Termokosit, kjo lagje nuk është e lidhur në rrjetin e ngrohtores së qytetit.

Diçka e tillë u ishte premtuar se do të bëhet në dy vjetët e fundit.

Fushat e sportit e parqet janë tjetër mungesë në këtë lagje.