Arbëri

Pacolli i kërkon Lekajt përkrahje për infrastrukturën në Prishtinë

Ministri i Infrastrukturës, Pal lekaj ka pritur sot në një takim nënkryetarin e Komunës së Prishtinës, Selim Pacolli, me të cilin kanë diskutuar për mundësinë e fillimit të një bashkëpunimi mes nivelit qendror dhe atij lokal.

Siç thuhet në një komunikatë dërguar nga Ministria e Infrastrukturës Pacolli kërkoi mbështetje financiare për projektet që mund të realizohen, nëse Ministria shpreh gatishmërinë e saj për të ndarë një buxhet të arsyeshëm edhe për kryeqytetin.

“Ministri Lekaj pohoi se Ministria e Infrastrukturës do t’u japë mundësinë e njëjtë të gjitha komunave, ashtu siç edhe mban përgjegjësi. Pra, duke deklaruar se edhe Prishtina do të ketë mundësinë e njëjtë të realizimit të projekteve infrastrukturore dhe se kërkesat për bashkëpunime të tilla do të jenë çdoherë të mirëpritura, duke mos lënë anash kornizën buxhetore”, thuhet në njoftim.

Siç bëhet e ditur nga ky njoftim Lekaj dhe Pacolli, u dakorduan që të realizohen projekte infrastrukturore në Komunën e Prishtinës.