Arbëri

Prishtina shpërblen fituesit në Olimpiadën Ndërkombëtare të Matematikës

Drejtoria e Arsimit e Komunës së Prishtinës, sot, më 28 korrik​ ​organizo​i​ pritjen për nxënësit pjesëmarrës në Olimpiadën Ndërkombëtare të Matematikës, që këtë vit u organizua në Brazil.

Pritja ​u​ realiz​ua​ nga drejtoresha e Drejtorisë së Arsimit, Arbërie Nagavci, drejtuesit e shkollës, mësimdhënësit dhe shokët e shkollës.

Në këtë garë të nivelit ndërkombëtar ku morën pjesë pothuaj​se ​të gjitha vendet e botës, në mesin e tyre ishin dy nxënës nga Komuna e Prishtinës, Shend Zhjeqi dhe Alban Elezi, të cilët e përfaqësuan Republikën e Kosovën në mënyrë dinjitoze.

Shend Zhjeqi, nxënës i gjimnazit Matematikë në Prishtinë, pas shkathtësive dhe kompetencave të jashtëzakonshme të treguara në Olimpiadën Matematike të Kosovës në nivel Komune dhe në nivel Republike, arriti të triumfojë edhe në nivelin ndërkombëtar, duke fituar Medaljen e Bronztë në Olimpiadën Ndërkombëtare Matematike (ONM).

Në njoftimin për këtë aktivitet nga Komuna e Prishtinës, thuhet se Drejtoria e Arsimit, për ngritjen dhe përmirësimin e cilësisë në arsim, në mënyrë të vazhdueshme organizon gara të ndryshme në nivel komune.

“Po ashtu, në funksion të zhvillimit të përmirësimit të cilësisë në arsim, Drejtoria e Arsimit në bashkëpunim edhe me Shoqatën e Matematicientëve, për çdo vit organizojnë garën “Olimpiada Matematike”, në nivel komune dhe Republike garë e cila po nxjerr në pah talentet e matematikës”, thuhet në njoftim.

Gjithnjë sipas njoftimit, Drejtoria e Arsimit, nga fillimi i funksionimit të gjimnazit Matematikë në vitin 2014, ka hasur në vështirësi dhe sfida të mëdha sepse Ministria e Arsimit, Shkencës dhe Teknologjisë ende nuk ka ndarë buxhet për funksionimin e këtij gjimnazi.

“​Përkundër peripecive të shumta Drejtoria e Arsimit ka arritur t’i tejkalojë çdo sfidë të paraqitur në gjimnazin Matematikë, duke e mbuluar dhe siguruar me staf të brendshëm dhe kushte të domosdoshme për funksionim e këtij institucioni, duke siguruar një proces të mësimdhënie dhe mësimnxënie cilësore sipas standardeve bashkëkohore”, thuhet në njoftim.

​Për arritjet e tyre, Shend Zhjeqi u shpërblye me çmimin prej 500 eurosh, ndërkaq Alban Elezi me 200 euro.​