Funksionimi i Institutit të psikiatrisë forenzike brenda QKUK-së vlerësohet i rrezikshëm

Mehmet Krasniqi Mehmet Krasniqi 25 May 2019 18:38

Tridhjetë e gjashtë persona me probleme mendore që kanë kryer vepra penale, janë duke u trajtuar në Institutin e Psikiatrisë Forenzike, i cili ndodhet në oborrin e Qendrës Klinike Universitare të Kosovës (QKUK).

Në kohën kur Komunës së Prishtinës i ishte kërkuar leja për ndërtimin e këtij instituti, më 2007, atë e kundërshtoi drejtoresha e atëhershme urbanizmit, Luljeta Çejku-Sokoli, raporton emisioni 038 i KTV-së.

Ajo nuk ishte pajtuar që të burgosurit psikiatrikë të vendoseshin në atë hapësirë, me arsyetimin se përbënin rrezik për pacientët dhe familjarët e tyre.

Insistimi i vazhdueshëm për të dhënë lejen e ndërtimit, Çejku-Sokoli thotë se e shtyu të jepte dorëheqje.

Praninë e Institutit në hapësirën e QKUK-së e vlerësojnë të rrezikshme edhe njohësit e çështjeve të sigurisë.

Se lokacioni nuk është i përshtatshëm e thotë edhe drejtori i Institutit, Gani Halilaj.

Megjithatë, Halilaj thotë se personat që trajtohen në institut, nuk i rrezikojnë frekuentuesit e tjerë të QKUK-së, pasi ata nuk lejohen të dalin jashtë.

Derisa instituti funksionon, sipas drejtorit Halilaj, ai nuk e ka të zgjidhur statusin e tij.

Ministria e Shëndetësisë nuk u është përgjigjur pyetjeve të televizionit, nëse do ta marrë institutin në kuadër të saj, apo nëse do të mbetet pjesë e Shërbimin Spitalor Klinik Universitar, siç është aktualisht.

Për këtë çështje, nuk është deklaruar as Komuna e Prishtinës.

© KOHA. Të gjitha të drejtat janë të rezervuara.

Komentet

Shto koment

Të ngjashme