Arbëri

S’funksionalizohet autobusi për Aeroport, MI-ja thotë se ka kryer punën e Komuna hesht

Vendi i autobusit me të cilin do të udhëtonin qytetarët për në aeroportin “Adem Jashari”, vazhdon të mbetet bosh.

Kjo pasi që linja e këtij autobusi nuk ka funksionuar asnjëherë, ani pse marrëveshja mes Komunës së Prishtinës dhe Ministrisë së Infrastrukturës, është nënshkruar që nga 24 janari i këtij viti, raporton KTV.

Kryetari i Prishtinës, Shpend Ahmeti, pati thënë se do të formohej një komision i cili do ta përcaktonte orarin dhe çmimin e biletës së autobusit.

Sipas udhëtarëve, ky autobus është i domosdoshëm.

Kosova vazhdon të mbesë vendi i vetëm në rajon që nuk ka linjë autobusi që lidh qytetin me aeroportin.

Çmimi për biletë të autobusit në njërin drejtim, në Shqipëri është 2 euro, kurse në Maqedoni 2 euro e 90 centë.

Çmimi i biletës së autobusit nga Prishtina në aeroportin “Adem Jashari”, nga ana e Ministrisë së Infrastrukturës, parashihej të ishte rreth 3 euro për një drejtim.

Zyrtarë të MI-së, përmes telefonit, i kanë thënë KTV- së se procedurat nga ana e kësaj ministrie janë kryer.

Por, zëdhënësja e Komunës së Prishtinës, Miranda Mullafazliu, gjatë javës, nuk ka kthyer përgjigje se kur do të fillojë të funksionojë kjo linjë.