Është pak kilometra larg qytetit, por fshati Zllatar i Prishtinës ka mbetur prapa në zhvillim.
Banorët ankohen se nga problemet më të mëdha janë mungesa e ujësjellësit dhe transportit publik, si dhe problemet me rrugë, raporton emisioni 038 i KTV-së.
Ata thonë se edhe ato pak gjëra që i kanë, janë krijuar falë kontributit të fshatarëve.
Fshatarët furnizohen me ujë përmes puseve që i hapin vetë, derisa përfaqësuesi i tyre thotë se ai ujë është i pashëndetshëm.
Trafiku Urban ka ekzistuar në Zllatar nga vitet e paraluftës, mirëpo është ndërprerë në vitin 2007.
Kjo po u kushton banorëve, pasi duhet të paguajnë transport privat për t’i dërguar fëmijët në shkollën e Matiqanit. Derisa, banorët tjerë duhet të bëjnë zgjidhje alternative.
Ismet Haziri, përfaqësues i banorëve të Zllatarit, thotë se nuk investohet në Zllatar vetëm pse komunarët nuk marrin shumë vota nga ky fshat i vogël me rreth 300 banorë.
Komuna thotë se shumica e sipërfaqes së Zllatarit është pronë private dhe kjo po ua pamundëson realizimin e projekteve, siç është vazhdimi i rrugës.
Gëzim Mehmeti, Drejtor për Investime Kapitale në Komunën e Prishtinës, thotë se Zllatari, sikur edhe në të kaluarën, është përfshirë në planifikimin buxhetor për vitet e ardhshme.
Sipas tij, projekti i rëndësishëm i unazës së brendshme do të kalojë pikërisht nëpër këtë fshat.
Ndërsa, sa i përket transportit urban, nga Zyra për Informim e Komunës kanë thënë se ky problem do të zgjidhet me Planin e Mobilitetit.
-
Nga: Mehmet Krasniqi
-
9 mars 2019 19:30
-
Shpërndaje në: