Rruga “Ilir Konushevci” është një nga më të frekuentuarat në Prishtinë. Gjithashtu, edhe nga rrugët me më së paku gjelbërim.
Banorët rreth kësaj rruge që të dërgon në lagjen “Kodra e Trimave”, janë të mllefosur me komunën, për shkak të mungesës së pemëve, raporton emisioni 038 i KTV-së.
Ata ankohen edhe për larjen e rrallë të rrugëve, çka bën që të përballen me pluhur kur temperaturat janë më të larta.
Në Komunë thonë se kanë bërë analiza për shtimin e gjelbërimit në këtë pjesë, por vështirësi po u krijojnë hapësirat e papërshtatshme për mbjelljen e drunjve.
Habib Qorri, Shef i sektorit të shërbimeve publike në Komunën e Prishtinës, thotë se deri më tani më shumë janë fokusuar në largimin mbeturinave nga rrugët.
Me ngritjen e temperaturave, ai shton se do të vazhdojnë edhe me larjen e rrugëve.
Ndërmarrja publike “Hortikultura” ka nisur mbjelljen e 6 mijë fidanëve, proces i cili do të vazhdojë edhe gjatë verës.
Hortikultura ka nisur këtë javë edhe mbjelljen e luleve sezonale dhe shumëvjeçare. Në lagjet e kryeqytetit do të mbillen një milion të tilla.
-
Nga: Mehmet Krasniqi
-
9 mars 2019 13:45
-
Shpërndaje në: