Ministria dhe Komuna të pakoordinuara rreth Spitalit të Prishtinës, ende vetëm bisedime

Mehmet Krasniqi 22 December 2018 12:01

Dhjetëra mijëra shërbime kryen çdo vit Qendra Klinike Universitare e Kosovës.

Një numër i madh prej tyre janë banorë të Komunës së Prishtinës, të cilët në mungesë të një spitali të qytetit udhëzohen nga Qendrat e Mjekësive Familjare për në QKUK.

Kështu kjo e fundit thotë se po mbingarkohet me pacientë edhe të nivelit sekondar, ndonëse do duhej të merrej vetëm me raste terciare, raporton "038" në KTV. 

Kanë kaluar shumë vjet nga ideja e spitalit të qytetit. Ndonëse ndërtimi i tij është tashmë edhe pjesë e ligjit për kryeqytetin, projekti për të është ende në fazën e diskutimeve ndërmjet Ministrisë së Shëndetësisë dhe Komunës për caktimin e lokacionit.

Ministri Uran Ismaili thotë se nuk po nguten me këtë projekt, pasi po duan që kur të fillojnë investimet të mos ketë ngecje.

“Është një projekt kapital, duhet të ketë pak kujdes sepse spitali ndërtohet njëherë. E kuptoj që pritjet e gjata që Prishtina të ketë spitalin e vet, kanë krijuar edhe nguti, por unë, si Ministër i Shëndetësisë, duhet bërë që të gjithë hapat të analizohen mirë, që në momentin që të fillojmë të mos kemi asnjë ngecje, asnjë ndalje”.

Ministria planifikon që vitin e ardhshëm ta hapë një konkurs për oferta në dizajnimin e spitalit, i cili, sipas Ligjit për Prishtinën, do të ofrojë shërbime sekondare.

Por, ndryshe deklarohet i pari i Prishtinës, Shpend Ahmeti.

“Nuk është si jemi dakorduar. Ne jemi dakorduar që ministria ta bëjë studimin e fizibilitetit. Se çka do të ketë ky spital, cilat shërbime, cilat spitale do të kalojnë nga QKUK, kur t‘i marrim vesh këto, atëherë e dimë edhe çfarë ndërtese po kërkojmë, rrjedhimisht çfarë toke. Nuk mund ta caktojmë lokacionin pa e ditë saktë për çka”.

Ndërsa, ish-drejtori i shëndetësisë në komunë nga Lëvizja Vetëvendosje, Arben Vitia, i cili është shkarkuar para më shumë se një muaji, ka treguar për atë që di rreth këtij projekti.

Vitia thotë se nuk ka qenë prezent në takimin e muajit prill ndërmjet ministrit Ismaili dhe kryetarit Ahmeti. Sipas tij, nga kjo kohë, kryetari Ahmeti e ka marrë vetë përsipër vazhdimin e projektit.

“Një takim të një karakteri tjetër, jo për këtë temë, që kam pasur me ministrin Ismaili, ministri më ka thënë që nga ky takim që e ka pasur me kryetarin Ahmeti janë dakorduar dhe pritet tani vetëm caktimi i lokacionit nga drejtoritë përkatëse në komunë se ku do të ndërtohet spitali dhe pastaj ministria do të vazhdojë me punët dhe investimet tjera”.

Ministria e Shëndetësisë ka përfshirë në buxhetin e vitit 2019 450 mijë euro për spitalin e qytetit, i cili në tërësi është paraparë të përfundojë së ndërtuari në vitin 2021.

© KOHA. Të gjitha të drejtat janë të rezervuara.

Komentet

Shto koment

Të ngjashme