Lifestyle

Lamtumirë pushime vere 2020

Si do të pushojnë evropianët këtë vit? Ministrat e Turizmit të BE-së nuk kanë ndonjë plan kohor për rigjallërimin e udhëtimit. Por nëse do të ketë pushime pas pandemisë, ato do të kalohen në rajonet e afërta.

“Kur dhe si do të hapen kufijtë për qarkullimin e udhëtarëve këtë nuk mund ta thotë kush me përgjegjësi tash”, thotë sekretari i shtetit në Ministrinë Federale të Ekonomisë në Gjermani, Thomas Bareiss, përgjegjës edhe për turizmin. “Nuk duket se ka gjasa që turistët gjermanë këtë verë të shkojnë në Spanjë apo në Greqi”.

Më shumë gjasa ka këtë verë, që ata t’i kalojnë pushimet në vend apo në rajonin pranë tyre.

Humbje të jashtëzakonshme

Gjendja ekonomike e industrisë së turizmit nuk është katastrofale vetëm në Evropën jugore rreth Detit Mesdhe, por edhe në Gjermani. Ekonomia e turizmit pret një rënie të rezervimeve të pushimeve me 70 për qind këtë vit.

Ministri kroat i Punëve të Brendshme edhe kryetari i radhës së Këshillit të Ministrave të turizmit në BE, Davor Bozhinoviq pas një videokonference me e kolegët e tij u shpreh, se do të veprohet me shumë kujdes në hapjen e kufijve të brendshëm dhe të jashtëm.

“Ishim të gjithë dakord, që para së gjithash duhet të pengojmë valë të reja të infektimit”, tha Bozhinoviq pa përmendur afate kohore.

Industria e turizmit në BE sjell 10 për qind të prodhimit të përgjithshëm bruto. Në disa vende si Greqia apo Malta kapaciteti ekonomik i industrisë së turizmit arrin afër 25%. Spanja përfiton afër 145 miliardë euro në vit vetëm nga sektori i turizmit, hotelet gjermane dhe koncernet turistike kanë arritur një xhiro vjetore prej 240 miliardë eurosh. Dëmi në Gjermani, nga vijnë shumë turistë, është shumë më i madh se në ato që njihen si “destinacione turistike”, si Spanja apo Italia.

Kur do të udhëtohet sërish

Ministri kroat i Turizmit, Gari Capelli, që mban kryesinë e radhës në BE shprehu shpresën, se evropianoveriorët, me gjithë pandeminë, do mund të udhëtojnë në jug, si një akt të solidaritetit evropian.

“Kemi nevojë për një plan të përbashkët për rimëkëmbjen e turizmit”, tha Capelli. Ajo që kërkohet është një koncept i përbashkët shëndetësor dhe një “pasaportë shëndetësore e Coronës” për udhëtarët dhe organizuesit e udhëtimeve, sipas Capellit. Kurse ministrja e Turizmit e Maltës, Julia Farrugia Portelli, kërkoi standarde të përbashkëta të BE-së lidhur me mbrojtjen e shëndetit në hotele, restorante, avionë dhe plazhe.

“Ka rreziqe, por ne duhet të dimë t’i menaxhojmë këto rreziqe”, tha ajo.

Qeveri të tjera evropiane janë më të rezervuara dhe ndjekin rrugët e tyre. Austria, për shembull, i hap sërish hotelet, por si udhëtarë lejohen vetëm ata nga shtetet fqinje dhe mundësisht nga rajone, ku përqindja e infektimit është e ulët. Kancelari austriak, Sebastian Kurz u rekomandoi austriakëve t’i kalojnë pushimet në vendin e tyre këtë vit.

Pleksiglas dhe korridore

Në Itali, hotelierët dhe pronarët e plazheve private po zhvillojnë koncepte të pazakonta për të ruajtur distancën mes pushuesve. Në plazh do duhet të vendosen xhama ndarës pleksiglas, hotelet duhet të zënë vetëm gjysmën e vendeve, në tavolina me distancë dy metra do ofrohen vetëm menu me një pjatë. Greqia mendon për një korridor turistësh nga Evropa perëndimore. Udhëtarë të testuar do të transportohen me avionë të posaçëm në komplekse turistike të testuar paraprakisht për koornavirus, u shpreh ministri grek i Turizmit, Charis Theocharis për konceptin grek. Belgjika mendon të shpërndajë karta hyrjeje në plazhe.

Por ende nuk dihet, se kur ministrat e Punëve të Brendshme të BE-së do të bien dakord për një plan të hapjes së kufijve për turistët. Fillimisht duhet të hiqen kufizimet e udhëtimit brenda shteteve të BE-së, pastaj mund të mundësohet udhëtimi për pushime mes shteteve fqinje, thonë zyrtarë të BE-së. Ende më e paqartë është, se kur do të jenë të mundura udhëtimet turistike në Azi, SHBA, apo pjesë të tjera të botës.

Ana tjetër janë edhe pushuesit. Pushimet nënkuptojnë relaksim e qetësim. A do duan pushuesit t’i kalojnë këtë vit pushimet pas pleksiglasit, pa party në bare, sport apo vizita të atraksioneve turistike? / DW